من وأنا صغير، كنت أحلم أكون صاحب مصلحة.
كنت أشوف الناس اللي عندها شغلها الخاص وأحكي لحالي:
“يوم من الأيام، بدي يكون إلي مشروعي… بطريقتي.”

عشان أوصل لهناك، دخلت عالم المبيعات.
اشتغلت بشركات تسويق واستشارات أعمال، وتعلمت
كيف الناس بتفكر، تبيع، وتقنع.
بس في شي كان ناقص… الظهور.
اليوم المصلحة اللي ما بنشوفها ما منشتري منها.
"الاشهر ببيع اكثر من الاشطر"

ومن هون بدأت قصتي مع الكاميرا
بالبداية كنت زي أي صاحب مصلحة…
خايف، متردد، بفكر: “شو الناس راح تحكي؟”
ما كنت بعرف كيف أحكي، ولا كيف أتصرف قدام الكاميرا،
وحتى المعدات كانت عالم غريب
إضاءة، مايكروفونات، عدسات، مونتاج…
بس مع هيك قررت أبدأ. صورت أول فيديو ما كان مثالي… بس كان نقطة البداية.

ولما نزلته، اكتشفت إني بحب التصوير، بحب أعبّر، بحب أطلع الجانب الحقيقي مني.
وبعد فترة، صورت أول صاحب بزنس. ولما شاف الفيديو، حكالي:
“أول مرة بحس إن المحتوى بشبهني.”
بهديك اللحظة، فهمت إني مش مجرد بصوّر…
أنا بساعد الناس يظهروا نفسهم الحقيقة، بطريقتهم، بطاقتهم، وبأسلوبهم.
اليوم، لما بصوّر أصحاب مصالح،
بهمني المحتوى يشبههم، بهمني الناس تحسهم زي ما هم على أرض الواقع.