إذا إنت جديد هون، خليني أحكيلك الحقيقة: أنا ما خلقت ومعي "جينة" الجرأة قدام الكاميرا، ولا كنت بعرف كيف بفتحوا التلفون وبحكوا بثقة.
ومن وأنا صغير، كنت أحلم أكون صاحب مصلحة.
كنت أشوف الناس اللي عندها شغلها الخاص وأحكي لحالي:
“يوم من الأيام، بدي يكون إلي مشروعي… بطريقتي.”

عشان أوصل لهناك، دخلت عالم المبيعات.
اشتغلت بشركات تسويق واستشارات أعمال، وتعلمت
كيف الناس بتفكر، تبيع، وتقنع.
بس في شي كان ناقص… الظهور.
اليوم المصلحة اللي ما بنشوفها ما منشتري منها.
"الاشهر ببيع اكثر من الاشطر"

ومن هون بدأت قصتي مع الكاميرا
بالبداية كنت زي أي صاحب مصلحة…
 كنت غرقان في دوامة من الأسئلة:

• "من وين وكيف أبدأ؟"
• "والأهم.. الناس اللي بتعرفني شو رح تحكي عني لما تشوفني بطلع فيديوهات؟"

كنت حاسس بخوف وكنت أقول لنفسي السوشيال ميديا مش إلي، والمهارة هاي مش عندي. بس في لحظة صدق مع حالي، قلت: "عبد الله، لوينتا بدك تهرب؟"

الحقيقة المرة كانت واضحة: إذا بدك تنجح اليوم وتكبر البزنس، ما عندك خيار غير تكون موجود وبقوة على السوشيال ميديا.

تحديت حالي.. وصوّرت أول "ريل"

بتذكر هذيك اللحظة منيح . الخوف كان كبير، بس النتيجة كانت أغرب مما توقعت. بمجرد ما نشرت الفيديو الأول، الخوف تحول لمتعة، والتوتر تحول لحب للكاميرا.

اكتشفت إنه فش أحلى من إنك تفرجي العالم "مين إنت عنجد"، وتشوف أثر شغلك على الناس، والأهم.. تشوف كيف البزنس تبعك بيكبر وزبائن جدد عم يدقوا بابك بس لأنهم "شافوك وعرفوك".
واليوم أنا بساعد الناس يظهروا نفسهم الحقيقة، بطريقتهم، بطاقتهم، وبأسلوبهم.